L’Ischis ma no l’Ischis: su resumu de sa die in Martis

Un die de ammentare cussa de domìniga passada, su 17 de nadale, in Martis, pro sa de tres editziones de “L’Ischis ma no l’Ischis”, die de congruos de sas atividades nostras, una manifestatzione importante meda pro sa promotzione de sa limba e de sa cultura sarda.

Maria Doloretta Lai, Presidente de s’Is.Be, at ghiadu sos traballos, cun su Diretore Michele Pinna chi at introduidu sas atividades cun sa relata sua “Sa Limba sarda in su mundu de eris, in sos mundos de oe, in su tempus c’at a bènnere”, in sa cale at marcadu s’importàntzia de custos adòbios pro torrare a sa vida sas comunidades e sos sardos chi creent chi sa limba siat trastu mèdiu pro sa cultura e pro s’identidade.   A congruire sos traballos est istada Daniela Masia Urgu, responsàbile de su COLCS (Coordinamentu  Operadores Limba e Cultura Sarda), cun sa relata “Ojos chi bident  no imbetzant. Bìdere pro connòschere, connòschere pro cumprendere”.

Cust annu amus cunsignadu 333 atestados de partetzipatzione a sos cursos promòvidos dae s’Is.Be in totu su 2017. Cursos de limba e cultura sarda, cursos de istòria de sa Sardigna, laboratòrios pro sos pitzinnos e unu laboratòriu de filosofia pràtica, pensados e dedicados a unu pùblicu de amantiosos e istudiosos lòmpidos dae sas provìntzias  de Tàtari, Nùgoro e Aristanis. Sas comunas interessadas in sos progetos, difatis, sunt istadas: Tàtari, Martis, Biddanoa Monteleone, Pàdria, Àldara, Mores, Isporlatu, Urtei, Gelisuli, Barì, Tortolì, Piaghe, Romana, Patada, Marrùbiu,  Nughedu, Ossi, Uri  e Ùsini. Importantes est de torrare gràtzias a sos/as dotzentes: Daniela Masia Urgu, Lucia Sechi, Francesca Sini, Antonio Carta, Stefano Alberto Tedde, Maria Leonarda Correddu, Adriana Cocco, Immacolata Salis, Anna Laura Pirisi e Ivan Marongiu e Maria Doloretta Lai.

De marcare sos interventos de sos polìticos e de sas pessones de cultura, de sos sìndigos de sas amministratziones cunvoltas, de sos cunsìgeris e assessores regionales.

Amus cusignadu finas sos Prèmios “Si moves sa Limba sa Limba ti movet”, destinados a chie at contribuidu, a manera significativa, a sa difusione e a sa promotzione de sa Limba sarda.

Su primu prèmiu est istadu assignadu a su poete “a bolu” Giuseppe Porcu pro àere promòvidu sa limba sarda cun sa capatzidade sua de artista improvisadore; su segundu prèmiu est istatu assignadu a  sos cursistas de Martis, pro àere sighidu cun profetu e continuidade su percursu formativu de limba e cultura sarda in sos annos 2015-2016-2017; sos cursitas at fintzas presentadu un’iscena de ispàssiu in limba sarda.

Unu prèmiu a s’ammentu de Enzo Espa, etnòlogu, iscritore e dotzente istraordinàriu, chi bene connoschiat sas traditziones de sa Sardigna. At ritiradu su prèmiu sa fìgia Anna Laura chi at ammentadu a su babbu cun emotzione manna.

Torramus gràtzias fintzas a Enrica Virdis, Rita Penduzzu e Franco Sechi de s’Iscola Tzìvica de Mùsica “Sonos”, chi nos ant acumpangiadu cun  sa mùsica garbosa issoro. Bravos meda!

Bos lassamus fintzas carchi fotografia (pro sas cales torramus gràtzias a Gianni Calaresu e a Salvatore Taras, chi acumprit fintzas a s’ufìtziu imprenta de s’Is.Be) de L’Ischis ma no l’Ischis 2017 e bos invitamus a s’annu chi benit!